برسلز بم دھماکوں میں ملوث تیسرے مشتبہ شخص کی تصویر جاری

مہر خبررساں ایجنسی نے ایسوسی ایٹڈ پریس کے حوالے سے نقل کیا ہے کہ بیلجیئم کے دارالحکومت برسلز بم دھماکوں میں ملوث تیسرے مشتبہ شخص کی تصویر جاری کردی گئی ہے ،حملہ آور کی تلاش کیلئے پولیس نےکئی علاقوں میں چھاپے مارے ہیں۔ دہشت گردوں نے پیرس کے بعد برسلز کو نشانہ بنایا اور گزشتہ روز ایئر پورٹ اور میٹرو اسٹیشن پر 4 دھماکے کئے۔
پولیس نے ایئر پورٹ حملے میں ملوث 3 افراد کی تصویریں جاری کر دی ہیں ،جس میں سے دو نے خود کو ایئر پورٹ پر اڑا لیا جبکہ تیسرا شخص فرار ہو گیا ۔
تیسرے مشتبہ حملہ آور کی تلاش کیلئے پولیس نے برسلز کے شائر بیک میں چھاپا مارا۔جہاں مبینہ طور پر حملے کی منصوبہ بندی کی گئی تھی ۔ برسلز کے دیگر علاقوں میں بھی مشتبہ افراد کی تلاش کیلئے چھاپے مارے جا رہے ہیں۔
حملے کے بعد برسلز میٹرو اسٹیشن دوبارہ کھول دیا گیا ہے ۔ جبکہ ایئر پورٹ آج بھی بند ہے۔ گزشتہ روز ہونے والے بم دھماکوں میں 35 افراد ہلاک اور 200 سے زائد زخمی ہوگئے تھے۔